Raat khoobsurat hai, neeNd kyuN nahi aati
baghair tere umr meri,kyuN guzar nahi jaati
mere saath ko taDapta hamrah wo raha
kyuN zindgi meri kuchh aur thahar nahi jaati
deewangi ko meri, kamzori samajh liya
samajh use muhabbat ki kyuN magar nahiN aati
sakhawat ki raahoN pe kuchh aur tum chalo
karamfarmayee logoN ko yuN nazar nahi aati
har sahar ka janm hai raat ki qabr pe
kyuN subah ke aane pe neeNd mar nahin jaati
taarikiyoN ko raat ki tanha jhelna mujhe
baghair sahe dukhoN ke rang-e-sahar nahi aati
na karwaN hi banta,na manzileiN hi miltiN
awam saath meiN tere azm-e-safar nahi aati
tafseel teri berukhi ki khatm kar hi paata
teri zulf meri aankhoN pe yuN bikhar nahi jaati
ruk gayee qalam meri waqt dekh dekh ke
takhleeq raat bhar se puracer nahi aati
koshisheiN heiN raaygaN tujhko dhoondne ki
kai dino se khud meiN khud tu nazar nahi aati
tera khayal sare bali hai,kyuN aashuftahaali hai
subah na aaye behtar hai,tu agar nahi aati.
abrar ulhaq
No comments:
Post a Comment