"MaaN"

MaaN

Apne haathoN ki lakeeroN meiN tumheiN dhooNd raha hooN
jin haathoN se nikal gayeeN tum ret ki tarah

sara ghar jo sharaabor tha tumhari roshani-e-azmat se
har ghosha hai tareek aur ghar sangrez ki tarah

har pursaane haal ke lafz raaygaN se heiN
ab to khushiyaN bhi lagti heiN parhez ki tarah

thaa sukuN wa thandak tumhare aanchal ki chhawN meiN
aur bachchoN ki jannat neeche tumhare paaNw meiN

tum aaNgan ka peD thi,tum sardi ki dhoop thi
tum pyar thi, saari kaaynat ka ek roop thi

tum haNsti thi to har bachcha khushi se bharta tha
tum khamosh hoti to sab kuchh kasakta tha

tumne kamzor ,kaNpkapate hathoN se balaayeiN liN
girte saNwarte hathoN se kitni du'aayeiN kiN

tumhare mooNh se jo aati thi paan ki khushboo
hameiN lagti thi saare jahaN ki khushboo

tumhare chehre par jo phikrogham ke nishan the
jinheiN mitaane tumhaare bachche pareshaan the

tum wo saagar thiN,jahaN saare dariyaa milte the
bachche tumhare saare, aakar tumse hi milte the

tumhare pyaar bhare haathoN ki narmi kahaN se laayeiN
sabko tajassum hai tumhari, tumheiN phir se chhoo jaayeiN

koi bashar eisaa nahiN, jise maaN ka khayaal na ho
aur uske jaane ka saNs-e-aakhir tak malaal na ho

ek tum thiN, jo mere tamgoN pe khush hu'aa karti thiN
aur meri pareshaniyoN meiN khul ke du'aa karti thiN

jaaNnamaaz meiN tumhari peshani ki khushboo hai
aur yahi mahak tumhare kamre ke har soo hai

tumhari tasweeh un haathoN ko dhooNd rahi hai
buDi ungliyoN ne jise kai baar chhuaa hai

kitni mitti meiN dabi ho, kitni shaffaq hu'a karti thiN
tumhare wuzoo ke rakhe paani ko ye ehsaas hua hai

ab sab aarzueiN ummeedoN ke madafan heiN
kitni khizaNdida ye aankheiN,ye gulshan heiN

log kahte heiN, tum hamare saath bahut din rahiN
nahiN qubool hameiN,tumhaara saath kyuN sab din nahiN ?

(tumheiN yaad hai jab tum zinda thiN,meiN akcer kaha karta tha.........)

god meiN tumhari gham kho gaye heiN sab
tum jaag rahi ho maaN,ham so gaye heiN sab

aur aaj

jaane se tumhare,yuN kho gaya hai sab
tum kho gayee ho maaN,jaise kho gaya hai rab

abrar ulhaq