apne hi aaspas tum jawabon meiN rahte ho

aankhoN ko band kar ke khwabon meiN rahte ho
kaanton ki shaakh pe gulaaboN mein rahte ho

koi tut ta sitara kabhi taqdeer badal de
shab-e-intzar ki chhat pe mehraboN meiN rahte ho

qarb-e-dil kahiN surat na ayaN kar de
hothoN pe tabassum ke naqaboN meiN rahte ho

taqdeer ka likha to hath ki lakeeroN meiN hai
kya dhooNdte tum kitaaboN meiN rahte ho

muhabbat hi la-faani hai aur rahegi ta-abad
ungliyoN pe chalte kaun se hisabon meiN rahte ho

yuN bhatak bhatak ke sham ghar laut aana
tum bachchon ke masoom intikhabon meiN rahte ho

na udas ho tum sawaloN ke jungle mein
apne hi aaspas tum jawaboN meiN rahte ho.

yuN raat ke gumbad pe khawabon ka basera hai

gila nahin mujhe tere intiqaam se
shuru karti hooN din tera naam se

dariya bhi aasmaN zamiN pe le aata hai
dikha ke kahkashaN paani meiN ahatram se

baaNdh ke suraj ko apne baazu mein
mujhe laDna hai andheroN se intzam se

teri aankhoN ke aayheene meiN khud ko saNwarooN
mile jo fursat kabhi apne kaam se

dhoop ruk gaye hai chhat ki mundher per
milane muflisi ko roshni ke qayaam se

joi meiN aayena ban ke khud meiN utarta hooN
ho jata hooN labbasta meiN khud kalaam se

yuN raat ke gumbad pe khwabon ka basera hai
koi tabir nahiN guzarti bala-e-baam se

kisi dastshanash ne meri hatheli ko dekha
waqif nahi kiya per mere anjaam se

jeene ki wajah

yuN is tarah jeene ki wajah se lagti ho
shabnam ka zewar pehne subah si lagti ho

tujhe chaaNd ke aqs jaise tashtri mein utaroon
aasma se uth ti chaNdni ki nigah se lagti ho

yuN baagwaN banke fasl-e-bahar ka
khushk zamiN pe baarish ki dua si lagti ho

gussa ki mukhtsar lahroN ki zindagi sa
saghar ko chhune wali hawa si lagti ho

dhoop ki imaraton ke garm shahar mein
thandi surmayee sham ki faza si lagti ho

yuN so gaya meiN barf ke takiye pe sar laga ke
kohre ke chilman se aati sada si lagti ho.

sukhan ki sirf tehreer nahin hooN

tere gunahon per tazeer nahiN hooN
meiN tere paaNv ki zanzeer nahin hooN

tu khud farishton ki dastras mein hai
meiN kisi kaaNch ki shamsheer nahi hooN.

meri chahat ko kaaghzoN meiN na zaya kar
tere sukhan ki sirf tehreer nahiN hooN meiN

waqt jo hoga khushbakht to laut aayega
tera pyar hooN meiN taqdeer nahiN hooN

mita ke mujhko tu bhool payega kaise
canvas per khiNchi koi lakeer nahiN hooN meiN

munjamid hooN meiN muhabbat ki ana per
kisi khairat ki muntazir haqeer nahiN hooN meiN

tere bas meiN kuchh aur insaaN nahiN hai

aur is se aage aasmaN nahiN hai
ab aur bulandiyoN ka imtihaN nahi hai

ye zindagi aur kar dooN tere naam
mere paas wafa ka saman nahin hai

diye bujh gaye chaand to roshan hai
usko bujhane wala tufan nahiN hai

awaz se uske mafhoom ko na jane
itna bhi is qadar tu nadan nahin hai

mere kadmoN ki aahat se jan leta hai
kaise kahooN usko meri pehchan nahiN hai

jiska haq hai use wapis kar de
na kahne de ki tu musalman nahiN hai

na tabeer mile per khwab to rahein
tere bas meiN kuchh aur insaaN nahiN hai

suna hai dostoN ke hawalon mein rahte ho

kahaN khoye tum kin khyaloN meiN rahte ho
koi afsana bankar risaaloN meiN rahte ho

shahar meiN har taraf tumhara charcha hai
ghire tum kaun se sawalon meiN rahto ho

sab ko maloom hai rat ki tarikiyoN meiN
taroN se chhip ke hilaloN mein rahte ho

har rat khudkashi kar lete ho
subah uth ke phir malaloN meiN rahte ho

suneiN us ghareeb ke hijr ka rutba
kaise khush, gham ke wisaaloN meiN rahte ho

ziqr tumhara koi fankar nahiN karta
abrar bas doston ke hawalon mein rahte ho

chala gaya asa-e-jahaN lekar

wo gaya meri rag-e-jaaN lekar
meri tanhayee ke imtihaaN lekar

khwab aankhoN mein de ke chala gaya
mere hujre se shabistaN lekar

kaise manzil tak meiN ta'akub karoon
chala gaya wo sang-e-nishaN lekar

fasal ke phal to de gaya jate jate
chala gaya mera baagwaN lekar

sar pe rakh ke judai ka aasmaN gaya
chhipa ke muhabbat ki khakdaaN lekar

apni yadoN ka jahaN chhoD gaya
chala gaya asa-e-jahaN lekar

zindagi pehle bhi kahaN apni shahada thi

jab muhabbat be-irada thi
meri hasrat bhi sar nihada thi

dosti apne paaNv chalti thi
zindgai kis kadar kushada thi

yuN mil ke us-se malooM hua
dosti uski mujhse zyada thi

door rahkar ke ye bhi dekh liya
dosti dushmani se saada thi

dushmani ho to bas itna malooM rahe
teri hasrat be be-labada thi

abrar ham na hoNge to kya farq paDega
zindgi pehle bhi kahaN apni shahada thi

Sang-e-nishaN se manzil ka gumaN kitna

baaqi rah gaya hai bas nishan itna
khaNdhar ke dastras ghar ka saman jitna

zarurteiN mere paaNv ki dekhne hi nahin deti
sang-e-nishan se manzil ka gumaaN kitna

sitare wo meri god meiN kitne bhar gaya
oDne ki doori par rah gaya aasmaN jitna

duniya se jane waloN ka t'aakub kare hai
pas ho to phir gaphil rahe insaaN kitna

tum mere paas ho,kya mere sath bhi ho
muhabbat ka hai bas imtihan itna

baad marne ke mujh per quran to bakhsh hi doge
ek dua abhi palkoN pe phooNk do,hai armaaN itna

Zindagi tere rang hazaar

na jane kitni khwahishoN ke beemar
zindagi tere rang hazaar

koi khush hai muflisi ke hone meiN
bhookh ki fasal zamin meiN bone mein
tahi damaN aarzu'eiN bhigone meiN
phir kya rakha hai ghaDi ghaDi ke rone meiN

khush zardar bhi hai shahi bichhone meiN
mast ghareeb bhi paDa hai kisi kone meiN

khush wo tawaaif bhi atari se nain laDati hai
har aate jaate pe khul ke khilkhilati hai

khushi khushi naya amir bhi car mein aata hai
apni baaryabi ke jashn manata hai

khush wo bhi hai jo andar se beemar hai
piye dard ko khud hi teemardar hai
jo bachcha hotloN meiN chaay laata hai
aate jate koi geet gungunata hai
malal usko bhi taleem ka shayad hi aata hai
kaam itna hai ki khyal kahaN aata hai

shauk-e-ana hai kisi haal meiN marta hi nahiN

is daur ka insaaN bhi hai kaisa insaaN
ghardish-e-halaat se darta hi nahiN

ishq ki raftar bhi hai eisi beparwah
rasmoN ke imtihan se guzarta hi nahi

zamane ke qahqahe dara dete haiN bahut
kisi aaNkh se aaNsu utarta hi nahin

khud insaaN kitni maut mar chuka ab tak
shauk-e-ana kisi hal meiN marta hi nahi

daur-e-suroor to aata hai guzar jata hai
hisab gunahon ka wo aaj bhi karta hi nahi

sailab khun aur paseenoN ka ghareebon ka le ke
khazana zardaroN ka aaj bhi bharta hi nahiN

paake sab kuchh bhi aaj dil mera
kisi muqam pe aake thar-ta hi nahiN

naya dard bayaN hota kuchh baat alag hoti

jo hoti zabaN aaNsuoN ki aur qahqahoN ki khamoshi
naya dard bayaN hota kuchh baat alag hoti

tere ram ka sunuN meiN fasana,tu paigham-e-muhammad ko paD
mazhab bhi naya hota, koi zaat alag hoti

Tu meri car meiN baith aur meiN teri chaupal meiN
hamdard samaN hota, ye hayat alag hoti

masjid ke pas mandir aur ek girjaghar
sab hamrah hote, baraat alag hoti

ki apne jazbon ko phir duhra ke dekhte
rasm-e-muhabbat ki saughat alag hoti

jo tu aati to chaNg faragat kar leta
koi din ayaN hota aur rat alag hoti

tera khwab

tera khwab hai ki dar dar ke rahta hai
pata laga'o kyuN sheeshe ke ghar meiN rahta hai

khauf se gahrayee wo kahaN ja baitha
chhip ke dariya se samandar meiN rahta hai

talashte khud ko khud ke darwaze pe dastak di
tera wajood kahaN tere ghar meiN rahta hai

kitna bhi door nigahoN se tu ho jaye
aqs tera meri nazar meiN rahta hai

sahra'oN ki taweel tapish bhi dushwar nahiN
tera hausla chasm-e-mukhtasar mein rahta hai

tamam afkar-o-asha'ar heiN tere sarnigu
kaun sa sher tere zok-e-nazar meiN rahta hai

kyuN bhatkta hai baichain rooh ko sath liye
tera hamsaya nahiN aam bashar meiN rahta hai

yuN hawaoN ko muth-thi meiN na tham mere yaar
tera basera faza'aoN meiN maho akhtar meiN rahta hai

Ek nayee subah ki shurua't

aao ek nayee subah ki shurua't kareiN
na akhbar paDeiN n daftar ke muzakrat kareiN

kamre se nikal ke lawn meiN baitheiN
bachchoN ke ziqre tassurat kareiN

ek arsa hua khud se door hu'e
kyuN na khud se aaj mulakat kareiN

Ye ghar jo banaya hai tumne khushnuma
qurban din ke aaj lamhaat karein

meri masrufiyat mujhe gah gah door karti hai
kyuN na faragat ke ikaththe jazbat karein

ahsasoN ko saja dein dar-o-baam per yuN
din eid sa ho raat shab barat karein

koi bahas na ho aaj tere mere beech
taro taza muhabbat ke ahsasat kareiN

yuN waqt bhi kuchh is tarah thahar jaye aaj
bas dostoN aur rishte ki hi bat kareiN

faraghat ka is din bhari ho subah per
zindagi tujhse wafa ke halat kareiN

Deewan-e-inam sahab

jinheiN pahuNche hazaroN salam sahab
hardil aziz heiN inam sahab
surat pe jiski sadgi si
andaz meiN shaistagi si
laboN pe jiske shaguftsi si
karte heiN tehreeroN mein qayam sahab

jo bhoone ki ada hai bholi
palat ke unse tapak boli
na bhoone ki fiqr karna
rahooNgi meiN ham kalam sahab

zuban-e-mumbai ne apun sikhaya
u.p. ne meiN aur tu banaya
zabaN ki taqeer koi kiye mukhatib
lafz-e-ham se kalam sahab

hausloN mein jinke hai shuja'at
kalam meiN jiske heiN sadaqat
adawat meiN jiske hai rafa'qat
hazaroN jinke heiN naam sahab

hai gussa jinka hubab jaisa
awad ke naram nawab jaisa
gharam kulcha-o-kabab jaisa
jise khake khush hai awam sahab

mashiyat ki zyada fiqr nahiN
be-wajah dauD-dhoop ka ziqr nahiN
jaise heiN khush heiN ye firakhdil
sabir heiN eise inam sahab

insanoN ko samajhte heiN cheeta
\cheeta jo doosre ka pani bhi nahi peeta
hay allah ye waqt hampe kaise bita
cherte heiN eise inam sahab

tehrereiN unki dalel-adeebaN hein
ziqre-hukumat aur chak ghareebaN heiN
nizame hasti aur ziqre pareeshaN heiN
insaniyat ka dete heiN paigham sahab

khaksari wa inqsaari
khooN meiN jiske imandari
path-throN pe chalne ko hamesha raji
rahoN se befiqr inam sahab

daba ke daatoN meiN apni uNgli
batate heiN roz nai koi gugli
kahiN ziqre paighame subah ujli
kahiN ziqre gardishe ayyaam sahab

hubbe watan aziz hai
mit-ti bhi jiski laziz hai
jate heiN hindustan ghah ghah
khane lucknow ke aam sahab

dosti laqat hai jiska
paighame mohabbat mazhab hai jiska
phir dost ho ya na aashna
karte heiN sabka ahtram sahab

ilm ka heiN wo badshah
aur lafzoN ke shahanshah
rok nahi pate daurane guftgu
karte heiN qata kalaam sahab

kabhi shri zaban to kabhi aatish nawa
ki jiski aawaz lage hamnaw
ki sholabar meiN bhi hooN aur tum bhi hamlawar
to un per kyuN lage ilzam sahab

kyuN wo shakhs bana hai paththar ka dewta
jhaNkkar koi dil meiN nahi dekhta

ki wo paththar kabhi bhi dhadak sakta hai
seene meiN jiske hoN imam sahab

jo waqt mile tum bhi aana
aur sath dostoN ko bhi laana
haiN jumerat ki rat karte
bar-b-qu ka ahatmam sahab

sab daur rahein hein jane kis raftar mein
koi tarakki ke liye koi fiqr-o-rozgar meiN
hai us be-niyaz ke waqt ikhityar meiN
thodi fiqre duniya aur thoda aaram sahab

chaliye ziqre inam bhi chor deiN
rukh qayadat ka kahiN aur mor deiN
koi n am sare fehrist lake kahaN se jod deiN
nahi waqt aur muhabbat ka koi aur intzam sahab

wo jab bahs-o-taqrar karein
khooN hamara thukwa deiN
waqeeloN ka kaam band kara deiN
judgoN se aag ugalwa deiN
bahas mein harte sar khujate
ham karte heiN kohram sahab

ghar inam sahab ho aapse ruthe
bas ek kaam kar lijiye
apni masrufiyat ko tarq karke
ek phone chhota sa kar lijiye
dil ke darwaze khule mileNge
eise hai jinka nizam sahab

dostoN milo na milo per baat hoti rahe
yuN is tarah dosti ki din o rat hoti rahe
kabhi kabhi creek park meiN mulakat hoti rahe
haieN kuchh is tarah ke usule inam sahab

sar e zindagi hai inam itna
char din ka bayan hai itna
do phone line mein kat gaye
do on line meiN

hamne bhi kaha nahi
aur aapne suna nahi
are wahi to ham kar rahe the
hai jinka takiya kalaam sahab.