ghar

ye ghar jisko sajaya tumne
kin baharoN se aashiyaN churaya tumne

jis kaDi dhoop meiN tapish meiN chhaNv na thi
kaise sardo sangeen usko banaya tumne

jo tum na thiN to koi mafhoom na the
sune makaN ko ghar ka unwan dilaya tumne

meiN rahta tha,behis,besada is taboot meiN band
ruh-o-dil ko qaid se aazad karaya tumne

teri taqdis hai ki itni raa'nayee hai
apne muqaddas hathoN se rachaya tumne

'''''''''''''
hawaaoN se khushboo lekar,faza'oN se bahareiN lekar
aasmanoN se rang lekar,baarish ko sang lekar
pahaDo se qadr lekar,tufanoN se sabr lekar
ghata'aoN se kaajal lekar,chattano se taqat lekar
sahraa'oN se mitti lekar,lahroN se sangeet lekar
dasht se noor-al-ain lekar,suraj se tamazat lekar
chamak taaroN se li,chand se ijazat lekat
phooloN se khushboo lekar, mahak raat ki raani se lekar
muskrahat se haNsi lekar, haNsi se zindagi lekar
............
teri hina ki khushboo mujhe hai chhoo jaati
shiddat-e-ahsas-nikhat ko mahkaya tumne

ye ghar jisko sajaya tumne
kin baharoN se aashiyaN churaya tumne

is paabandi-e-ishq meiN kuchh to qazaa de

Tod kar meri neend mujhko jaga de
yuN mujhe phir haqiqat ki saza de

tumko musalsal meiN kyuN chaahta rahooN
is pabandi-e-ishq meiN kuchh to qazaa de

junoon-e-mohabbat meiN hai ab ibaadat bhi tehleel
aqeedat ke is karam ki, kuchh to jazaa de

kisaan isi aas par beej rahe bote
kaalighata ko baarish phir apni raza de

ye khaqdaaN heiN tere qadmoN ki muntazir
jaati hu'ee bahaar ko kuchh aur fazaa de

meiN hooN mehte-parwaaz apne hi uphaq meiN
faasloN ke phikrogham na mujhko sadaa de

KyuN aa'eeneiN mujhe dekh ke katrate rahe

meiNe to gham ko chehre pe aane bhi na diya
kyuN aayeeneiN mujhe dekh ke qatraate rahe

ghar ke beech mere, deewar khaDi na karna
dar-o-deewar rahe baqi, insaan kahiN jaate rahe

bhoolkar tujhe tere,khayaloN ki qasam
yaadoN ki tere hi, tasweer banate rahe

dosto mil ke hum, waqt ko saNwaareiN
yuNhi din subaho-shaam aate rahe,jaate rahe

dosto milne ki wajah na dhooNdheiN
aap na aane ke wajuhaat batate rahe

(on recession)
ye daur-e-ghardishaN heiN kisi mehmaan ki tarah
kuchh din zaroor theHre, kuch baad jaate rahe

taboot

Hisaar-e-taboot meiN hooN band kab se
kat gaya hooN,zamaane se,tumse sab se

taboot ke baahar ek duniya basti hai
jhooth,fareb aur banawti roop rachti hai
naqli muskrahatoN,dhokhoN ke baazar heiN yahaN
har ek shai kisi bhi daam pe bikti hai

zardaar,zamiNdaar ke iqtidaar hai yahaN
jismeiN jitni taaqat hai baat uski chalti hai

kaarobar ki meetingeiN jahaN hotloN meiN hoti heiN
faayleiN sarkari daftaroN meiN band soti heiN

sachchaai,paakizgi aur insaaf ke roz sode hote heiN
imaanwale roz marte heiN,zinda hoteiN heiN,roz marte heiN.

jamaakhori ke ilzaam lage heiN mujh par
band tehkhaano meiN paDa hooN kab se

hisaar-e-taboot meiN hooN band kab se
kat gaya hooN ,zamane se,tumse,sab se

abrar ulhaq